زاوية خضراء. بقلم:داؤد ابوكلام داؤد. الهلال الاحمر السوداني وين الإنسانية.؟؟

معروف الدور الذي تلعبه وتقوم به منظمات المجتمع المدني.(NGOs).الوطنيه منها والاجنبيه.بالاضافة لمنظمات الامم المتحده مثل اليونسيف والصحة العالميه و(Undp) والغذاء العالمي (WFB) وغيرها تلعب هذه المنظمات الانسانية أدوار. تساعد الحكومات الوطنية. وقت الازمات والكوارث الطبيعية والنزاعات الداخلية والمجاعات والسيول والفيضانات والزلازل. والنزوح واللجوء. وتقوم بخدمات الايواء والغذاء والصحة واعادة التوطين. وغيرها.من الادوار وجمعية الهلال الاحمر السوداني واحده من هذه المنظمات. وهي جمعيه طوعيه لها قانونها الوطني وكيفية تكوينها وتأسيسها. ولها علاقاتها وارتباطاتها باتفاقيات (بجنيف). التي تنظم عمل الصليب والهلال الاحمر الدوليين.؟ لاحظت خلال الفترة الماضية هناك خلافات ونزاع بين ادارة الهلال الاحمر السوداني بكادقلي والخرطوم. وصل لدرجة فصل مديرها بكادقلي.الدكتور/مريخه الضوء مريخه. وايقاف مرتبات المتطوعين والدعم من الولاية. وتبليغ البنوك بايقاف وعدم اعتماد توقيع مريخه الضوء.بل تطور الامر بالاعلان في الصحف بانهم ليس لهم علاقه بالمدعو مريخه الضوء مريخه خالص خالص؟؟. ويجب عدم التعامل معه فيما يتعلق بالهلال الاحمر بجنوب كردفان.!! وان يتم تسليم المكتب فورا. لنائبه السيد/كمال دبيو. ورفض الدكتور/ مريخه الضوء التسليم لكائن من كان. واعتبر ما هذه الا مؤامره حيكت بليل دامس الظلام مثل ليالي الخريف ظلمات بعضها فوق بعض؟؟. تعالوا معنا ايها الساده والسيدات. لنتعرف علي اصل المشكله كيف بدأت والي اين المنتهي.!؟ وما هي الشراره التي اججت كل هذه النيران.؟؟ من خلال التقصي والمقابلات والاتصالات التي قمت بها مع كل الاطراف.؟ للوصول للحقيقه المجرده. والامر متروك لكم للتقييم؟ وجدنا أن شرارة المشكلة بدأت عندما قام شخص يعمل بالهلال الاحمر السوداني الخرطوم ويدعي ( مامون الحاج عبد اللطيف). بالتبليغ علي عربه لوري (Zs) تابعه للهلال الاحمر قادمه من جنوب كردفان وشاحنه فحم. بالحاج اليوسف بالخرطوم بحري. ومعها مواطن قال مؤجرها من( خليل دبه) الهلال الاحمر بجنوب كرفان. وتم فتح بلاغ بالشرطه في العربه بما فيها الفحم وسلمت للهلال الاحمر بالخرطوم.؟ وهنا جن جنون دكتور/ مريخه وقال الاستثمار حلال علي بلابل الدوح في الشماليه وحرام علي طيور السمبر في جبال النوبه ههههه.؟ وقام مباشرة في فتح بلاغ. وتم القبض علي الزول المتربص داااك. وجابوهو مكلبش الي كادقلي.؟ حتي يعرف الله واحد والقانون حق. وانتشرت النار في الهشيم؟ وهاج الهلال الاحمر في الخرطوم وكرب صلبو ؟ وقال الظاهر مريخه ده ماعارف في ادره جديده جات في ظل ثورة ديسمبر المجيدة؟ وجابت ملفات كادقلي وبركدت..بركدت؟ وقالت هو مريخه ده ذاتوا عنده كميه من التجاوزات جاتنا بلاغات من عدد من الجهات بشانه. منها ديون تتعلق بصيانات واسبيرات عربات ىالهلال الاحمر بكادقلي. وتجاوزات اداريه في الدلالات وغيرها. ههههه طبعا في ناس من زماااان لابدين لمريخه وقالوا. هو ذاتوا اكبر دكتاتوري قاعد له(22) .سنة في الهلال الاحمر بكادقلي. وفصل عدد من الكوادر والمتطوعين لهم خبره دون وجه حق.!! وجاء بناس من الخرطوم واختار خاصته ناس ادم بابكر عثمان وغيرهم. وعنده علاقه بالاستخبارات والامن الشعبي والعدل والمساواه والنظام البائد. وما هو إلا (فله). من الفلول.؟؟. ههههههاي ومريخه سخن وارقي ثم ازيد. حتي تعلق الزبد علي اطراف شفتييه .كمال. يفعل الجمل الهادر؟؟ طبعا عنده حزام اسود في الكراتيه وعدد من الدانات في فنون القتال. وشكله دخل غرفته ولبس لبس الكراتيه.وربط الحزام الاسود في صلبو. ومشي قعد في الكرسي وقال الراجل ولا كن مراة ذاتها. يجي يشيلني.ما بتشيلني الا الجمعيه العموميه…. بلا فوضي معاكم.؟؟ وقام الهلال الاحمر في الخرطوم برضة سخن. و فوض محامي ؟ وقال لنائبه بكادقلي كمال دبيو.. امشي استلم منو؟؟ ههههاي كمال دبيو الا ياكل عسل مخلوط بسمسم مزلوط.؟ ويمشي يتفاوض مع مريخه ويكون واقف علي مسافة سبعة أمتار وخمسه وعشرين سنتمتر.. .ويخلي بالو.. من باب العتبه.؟؟ عشان ما معروف عواقب التفاوض.؟؟ عموما مساحة الزاوية الخضراء انتهت رغم سواد المشكله. قد تحصلنا علي المستندات من الطرفين ومريخه بقول تم فصله قبل المرور بخطوات الاجراءات المعروفه من الإستيضاح واستجواب ولجنه وجمعيه عموميه.؟. والهلال الأحمر بالخرطوم يقول هذا قرار لا رجعة فيه و الهلال الاحمر منظمه حره ومستقله وتحكمها اتفاقيه جنيف بعيدا من الحكومه،. وحكومة الولاية قاعدة تتلفت جاي وجاي ما عارفه تعمل شنو؟؟ وحتي مجلس السياده والوزراء وجنيف في اعتقادي عندهم خبر بموضوع كادقلي وهلاله الاحمر…؟؟ فما هو الحل ايها السادة والسيدات. يا قيادات الهلال الاحمر من ناحيه انسانية جبال النوبه وجنوب كردفان تعاني الامرين.امر. خلافاتكم الاداريه وامر بلاوي الحرب وافرازاتها المعروفه لديكم.؟ والناس منتظره خدماتكم الانسانية.؟ والخرطوم قالت لو دايرين بس مريخه ىيسلم المكتب ويمشي بس..و اي زول تختاره الولايه لرئاسه الهلال الاحمر.. تنتهي المشكله ؟ وبكره القريبه دي.. الهلال الاحمر بكادقلي يبقي ذي الجنه ونمره واحد في تقديم الخدمات.الانسانيه علي مستوي السودان.؟ومريخه قال ما بمشي الا عبر اهل الولايه وجمعيته العموميه.؟ دي مصيبة شنو دي الوقعنا فيها…الفزع …الفزع.. قلنا الروووب الحامض.؟؟ ياناس مجلس ادارة الهلال الاحمر السوداني ولجنته التسيريه بالخرطوم. شعب جبال النوبه وجنوب كردفان في انتظاركم افيدونا.؟؟
المك/داؤد ابوكلام داؤد. السبت/17 اكتوبر 2020.