زفرات حرى. الطيب مصطفى. اضحكوا قليلا مع وجدي صالح!

وقال وجدي صالح بتاع (الصامولة صامولة) في ايام نشوتهم وفرحتهم بتسلمهم السلطة ، قال امام بعض القطيع :
(نحن عندنا دهب مفترض يورد للخزانة العامة (11) مليار دولار وعندنا الصمغ العربي بيورد ستة الاف دولار ، دي (17) مليار.. كل احتياجاتنا من الواردات (11) مليار.. حا يبقى عندنا فائض ستة مليار ، دي (نشتتا) على الصرافات والبنوك واي زول عاوز دولار نديهو.. نحن لسع ما اتكلمنا عن الزراعة والحاجات التانية!)
*عليكم الله : ايهما اكثر (إمتاعا) وجدي ام محمد عصمت بتاع ال (64) مليار (القاعدة) في ماليزيا؟!*

*تلاتيييييين سنة؟!*
معزوفة القحاطة المفضلة.. (انتو عاوزننا خراب تلاتييييييين سنة نعالجوا ليكم في شهور ؟!
طيب يا حمدوك ويا قحاتة .. معلوم أن المريض يأتي للطبيب لكي يعالجه حتى الشفاء او على الاقل يبقيه على حاله ، لا ان يتسبب في تدهور حالته الصحية او في وفاته.
اقرؤوا قرائي الكرام هذه الاحصائيات واحكموا وقارنوا ، هل جاء هؤلاء مصلحين ام مخربين ، ثم أما آن لهم بالله عليكم أن يرحلوا؟!
صادر الذهب تراجع من (832) مليون دولار في عام 2018 إلى (249) في2019 , كما تراجع صادر الثروة الحيوانية من (765) في عام2018 الى (146) مليون دولار , وكذلك الحال بالنسبة للصمغ العربي الذي نقص صادره من (576) مليون دولار الى (46) مليون دولار.
وذلك كان حال جميع الصادرات الأخرى!
*(بربكم الا ينبغي لهؤلاء الفاشلين ان يحملوا بقجهم ويغادروا؟!)*

*الدولار بين الأمس واليوم!*
قال قائل قحت ايام اشتداد الازمة الاقتصادية في الاشهر الاخيرة من حكم الانقاذ :
(اي زول يمشي يغير قروشو لي دولار ، والعندو كاش سوداني اوع يوديهو البنك ، امسك قروشك عليك ، لو ما سقطنا الكيزان ديل الدولار يمكن يصل (70) ورطل السكر يصل (40) وحانبيت في صفوف الطلمبات والافران)!
*اها يا قحاتة .. الدولار حسع وصل كم ورطل السكر بي كم ، وصفوف الطلمبات والافران عاملة كيف؟!*

*(بين ودالفكي ورشيد سعيد)*!
ضحكت ملء شدقي لخبر (فكاهي) يقول إن عضو المجلس السيادي محمد الفكي بحث في اجتماع مع وزير الطاقة المكلف خيري عبدالرحمن ووالي غرب كردفان عماد عبدالرحمن امكانية تنفيذ مشروعات الكهرباء لتغطية بعض محليات غرب كردفان بجانب موقف العمل في محطة الفولة!
بالله عليكم من يبلغ اعضاء المجلس السيادي أنه لا علاقة لهم بالعمل التنفيذي ، وليت هذه النصيحة يعمل بها السياديون الخارجون على الوثيقة الدستورية التي حددت مهام كل من السلطتين التنفيذية والسيادية التي وصفها حميدتي ب(الاشرافية) سيما في ملف السلام الذي اختلط فيه الحابل بالنابل !
*اقترح على ودالفكي أن ينضم الى شلة الكوشتينة بتاعت ناس فيصل ورشيد سعيد ولقمان ، لأن الفراغ قاتل!)*

*حمدوك ووزارة المالية!*
وقال احد نشطاء قحت ايام الهياج الثوري قبل ان يخذلهم حمدوك ويكتشفوا انه (طلع ماسورة) قال :
(دكتور حمدوك لو كان وافق للكيزان يبقى وزير مالية كان ح تكون كارثة ، لانه ح يطلعهم من الازمة الاقتصادية بي مؤهلاته
وخبرته و علاقاته ،، لكن ربنا لطف ،، حمدوك ح يكون منقذ السودان بس تنجح ثورتنا ،، ونبنيهو )!
*وقال آخر قبل أن تذهب السكرة وتأتي الفكرة*
المجتمع الدولي و امريكا ح يرفعوا الحظر عن السودان بس يدكم معانا نسقط الكيزان الارهابيين ديل ،، دا غير الدعم الدولي الملياري المجااااني من اول يوم .. و حنبيهو البنحلم بيهو يوماتي!
*يا ربي النشطاء الحالمين. ديل حسع بيكونوا وين؟! اخشى عليهم من الاكتئاب المسبب للوفاة انتحارا!*